ಸಾವಿನ ಕಲ್ಲಂಗಡಿ: ಮುಂಬೈನಲ್ಲಿ ಹಣ್ಣು ತಿಂದ ಒಂದೇ ಕುಟುಂಬದ ನಾಲ್ವರ ದಾರುಣ ಅಂತ್ಯ – ಬೆಚ್ಚಿಬೀಳಿಸುತ್ತೆ ಈ ಘಟನೆ!

ಮುಂಬೈ: ಬೇಸಿಗೆಯ ಬಿಸಿಲಿನಿಂದ ಪಾರಾಗಲು ನಾವು ಅತಿ ಹೆಚ್ಚಾಗಿ ಅವಲಂಬಿಸುವುದು ಕಲ್ಲಂಗಡಿ ಹಣ್ಣನ್ನು. ಆದರೆ, ಇದೇ ಕಲ್ಲಂಗಡಿ ಹಣ್ಣು ಒಂದು ಸುಂದರ ಕುಟುಂಬವನ್ನೇ ಬಲಿಪಡೆದ ಘಟನೆ ವಾಣಿಜ್ಯ ನಗರಿ ಮುಂಬೈನಲ್ಲಿ ನಡೆದಿದೆ. ಕಲ್ಲಂಗಡಿ ಸೇವಿಸಿದ ಕೆಲವೇ ಗಂಟೆಗಳಲ್ಲಿ ಒಂದೇ ಕುಟುಂಬದ ನಾಲ್ವರು ಸದಸ್ಯರು ಸಾವನ್ನಪ್ಪಿದ್ದು, ಇಡೀ ದೇಶವನ್ನೇ ಈ ಸುದ್ದಿ ಬೆಚ್ಚಿಬೀಳಿಸಿದೆ.

ಏನಿದು ಘಟನೆ?

ದಕ್ಷಿಣ ಮುಂಬೈನ ಪೈಧೋನಿ ನಿವಾಸಿಗಳಾದ ಅಬ್ದುಲ್ಲಾ ದೋಕಾಡಿಯಾ (40), ಪತ್ನಿ ನಸ್ರೀನ್ (35) ಮತ್ತು ಅವರ ಇಬ್ಬರು ಪುತ್ರಿಯರಾದ ಆಯೇಷಾ (16) ಹಾಗೂ ಜೈನಾಬ್ (13) ಮೃತಪಟ್ಟ ದುರ್ದೈವಿಗಳು. ಕಳೆದ ಶನಿವಾರ ರಾತ್ರಿ (ಏಪ್ರಿಲ್ 25) ಈ ಕುಟುಂಬವು ತಮ್ಮ ಸಂಬಂಧಿಕರೊಂದಿಗೆ ಬಿರಿಯಾನಿ ಮತ್ತು ಪಲಾವ್ ಊಟ ಮಾಡಿತ್ತು. ಊಟದ ಬಳಿಕ ಅಬ್ದುಲ್ಲಾ ಅವರ ಕುಟುಂಬ ಮಾತ್ರ ತಡರಾತ್ರಿ 1:30ರ ಸುಮಾರಿಗೆ ಕಲ್ಲಂಗಡಿ ಹಣ್ಣನ್ನು ಸೇವಿಸಿತ್ತು.

ಮಾರಕವಾದ ‘ಆ’ ಕಲ್ಲಂಗಡಿ ಹಣ್ಣು!

ಮರುದಿನ ಬೆಳಿಗ್ಗೆ 5:30ರ ಸುಮಾರಿಗೆ ಕುಟುಂಬದ ನಾಲ್ವರಿಗೂ ತೀವ್ರ ವಾಂತಿ ಮತ್ತು ಭೇದಿ ಕಾಣಿಸಿಕೊಂಡಿದೆ. ತಕ್ಷಣ ಅವರನ್ನು ಸಮೀಪದ ಆಸ್ಪತ್ರೆಗೆ ದಾಖಲಿಸಲಾಯಿತು. ಆದರೆ, ಚಿಕಿತ್ಸೆ ಫಲಕಾರಿಯಾಗದೆ ಭಾನುವಾರ ಬೆಳಿಗ್ಗೆ ಮೊದಲು ಕಿರಿಯ ಪುತ್ರಿ ಜೈನಾಬ್ ಸಾವನ್ನಪ್ಪಿದರೆ, ನಂತರ ಪತ್ನಿ, ಹಿರಿಯ ಪುತ್ರಿ ಮತ್ತು ತಡರಾತ್ರಿ ಅಬ್ದುಲ್ಲಾ ಕೂಡ ಕೊನೆಯುಸಿರೆಳೆದಿದ್ದಾರೆ.

ಗಮನಾರ್ಹ ಅಂಶ: ರಾತ್ರಿ ಕುಟುಂಬದೊಂದಿಗೆ ಊಟ ಮಾಡಿದ್ದ ಐವರು ಸಂಬಂಧಿಕರಿಗೆ ಯಾವುದೇ ತೊಂದರೆಯಾಗಿಲ್ಲ. ಅವರು ಕಲ್ಲಂಗಡಿ ಹಣ್ಣನ್ನು ಸೇವಿಸಿರಲಿಲ್ಲ. ಕಲ್ಲಂಗಡಿ ತಿಂದ ನಾಲ್ವರು ಮಾತ್ರ ಸಾವನ್ನಪ್ಪಿರುವುದು ವಿಷಾಹಾರದ (Food Poisoning) ಅನುಮಾನವನ್ನು ದಟ್ಟವಾಗಿಸಿದೆ.

ಪೊಲೀಸ್ ತನಿಖೆ ಮತ್ತು ವೈದ್ಯರ ಆತಂಕ

ಪ್ರಕರಣ ದಾಖಲಿಸಿಕೊಂಡಿರುವ ಜೆ.ಜೆ. ಮಾರ್ಗ ಪೊಲೀಸ್ ಅಧಿಕಾರಿಗಳು ಕಲ್ಲಂಗಡಿ ಹಣ್ಣಿನ ಮಾದರಿಯನ್ನು ಲ್ಯಾಬ್‌ಗೆ ಕಳುಹಿಸಿದ್ದಾರೆ. “ಕೇವಲ ಕಲ್ಲಂಗಡಿ ಹಣ್ಣಿನಿಂದ ಇಷ್ಟು ಬೇಗ ಸಾವು ಸಂಭವಿಸುವುದು ಅಪರೂಪ. ಹಣ್ಣಿಗೆ ಇಂಜೆಕ್ಷನ್ ಮೂಲಕ ಯಾವುದಾದರೂ ರಾಸಾಯನಿಕ ಸೇರಿಸಲಾಗಿದೆಯೇ ಅಥವಾ ಫ್ರೀಜ್ ಮಾಡಿದ ಹಣ್ಣಿನಲ್ಲಿ ಬ್ಯಾಕ್ಟೀರಿಯಾ ಬೆಳೆದಿತ್ತೇ ಎಂಬ ಬಗ್ಗೆ ತನಿಖೆ ನಡೆಯುತ್ತಿದೆ” ಎಂದು ವೈದ್ಯರು ತಿಳಿಸಿದ್ದಾರೆ.

ಈ ಘಟನೆಯು ಹಣ್ಣುಗಳನ್ನು ಕೊಳ್ಳುವಾಗ ಮತ್ತು ಸೇವಿಸುವಾಗ ನಾವು ವಹಿಸಬೇಕಾದ ಎಚ್ಚರಿಕೆಯ ಬಗ್ಗೆ ದೊಡ್ಡ ಎಚ್ಚರಿಕೆ ಗಂಟೆಯಾಗಿದೆ.

Recent Articles

ಶಾಸಕ ಹ್ಯಾರಿಸ್ ಪುತ್ರರಿಗೆ ಇಡಿ ಶಾಕ್! ಬಿಟ್‌ಕಾಯಿನ್ ಹಗರಣದ ನಂಟಿನ ಬೆನ್ನತ್ತಿದ ಅಧಿಕಾರಿಗಳು: ಕೋಟಿ ಕೋಟಿ ಹಣದ ವಹಿವಾಟು ಬಯಲಿಗೆ?

ಆತಂಕಕಾರಿ ವರದಿ: ಎಸ್ಎಸ್ಎಲ್‌ಸಿ ಪರೀಕ್ಷೆಯಲ್ಲಿ 19,000 ವಿದ್ಯಾರ್ಥಿಗಳು ಕನ್ನಡದಲ್ಲೇ ಫೇಲ್! ತಾಯ್ನುಡಿಯನ್ನೇ ಕಡೆಗಣಿಸಿದರೇ ವಿದ್ಯಾರ್ಥಿಗಳು?