ವಿಶ್ವ ದಾಖಲೆ ಉಡೀಸ್ ಮಾಡಿದ “ಸುಮಿತ್ ಅಂಟಿಲ್” – ಪುರುಷರ ಜಾವೆಲಿನ್ ಥ್ರೋ.

ಬೆಂಗಳೂರಿನಲ್ಲಿ ನಡೆಯುತ್ತಿರುವ ಇಂಡಿಯನ್ ಓಪನ್ ಇಂಟರ್ನ್ಯಾಷನಲ್ ಪ್ಯಾರಾ ಅಥ್ಲೆಟಿಕ್ಸ್ ಚಾಂಪಿಯನ್‌ಶಿಪ್ಸ್‌ನಲ್ಲಿ ಭಾರತದ ಹೆಮ್ಮೆಯ ಪ್ಯಾರಾ ಅಥ್ಲೀಟ್, ಪ್ಯಾರಾಲಿಂಪಿಕ್ ಚಾಂಪಿಯನ್ ಸುಮಿತ್ ಅಂಟಿಲ್ ಮತ್ತೊಮ್ಮೆ ಇತಿಹಾಸ ಸೃಷ್ಟಿಸಿದ್ದಾರೆ. ಪುರುಷರ ಜಾವೆಲಿನ್ ಥ್ರೋ F64 ವಿಭಾಗದಲ್ಲಿ ತಮ್ಮದೇ ಹೆಸರಿನಲ್ಲಿದ್ದ ಹಳೆಯ ವಿಶ್ವ ದಾಖಲೆಯನ್ನು ಧೂಳೀಪಟ ಮಾಡಿರುವ ಅವರು, ನಂಬಲಸಾಧ್ಯವಾದ ಪ್ರದರ್ಶನ ನೀಡುವ ಮೂಲಕ ಇಡೀ ಕ್ರೀಡಾಲೋಕವೇ ಭಾರತದತ್ತ ತಿರುಗಿ ನೋಡುವಂತೆ ಮಾಡಿದ್ದಾರೆ.

ಮೈ ನಡುಗಿಸುವ 74.82 ಮೀಟರ್ ಎಸೆತ!

Historic feat!

Congratulations to Sumit Antil on shattering the World Record yet again with a massive 74.82m throw at the Indian Open Para Athletics Championship 2026. pic.twitter.com/fFsKL1WSaU

— Dr Mansukh Mandaviya (@mansukhmandviya) May 27, 2026

ಬುಧವಾರ ನಡೆದ ಜಾವೆಲಿನ್ ಥ್ರೋ ಫೈನಲ್ಸ್‌ನಲ್ಲಿ ಹರಿಯಾಣ ಮೂಲದ 27 ವರ್ಷದ ಸುಮಿತ್ ಅಂಟಿಲ್, ಬರೋಬ್ಬರಿ 74.82 ಮೀಟರ್ ದೂರಕ್ಕೆ ಭರ್ಜಿ ಎಸೆಯುವ ಮೂಲಕ ಚಿನ್ನದ ಪದಕವನ್ನು ಕೊರಳಿಗೇರಿಸಿಕೊಂಡಿದ್ದಲ್ಲದೆ, ಹೊಸ ಜಾಗತಿಕ ದಾಖಲೆಯನ್ನು ಬರೆದಿದ್ದಾರೆ. ಈ ಹಿಂದೆ 2022ರ ಹ್ಯಾಂಗ್‌ಝೌ ಏಷ್ಯನ್ ಪ್ಯಾರಾ ಗೇಮ್ಸ್‌ನಲ್ಲಿ ಅವರು ನಿರ್ಮಿಸಿದ್ದ 73.29 ಮೀಟರ್ ಸಾಧನೆಯೇ ಅತ್ಯುನ್ನತ ದಾಖಲೆಯಾಗಿತ್ತು. ಈಗ ಆ ದಾಖಲೆಯನ್ನು ಅವರೇ ಮುರಿದು ಮುನ್ನಡೆದಿದ್ದಾರೆ.

ಕ್ರೀಡಾಂಗಣದಲ್ಲಿದ್ದ ಪ್ರೇಕ್ಷಕರು ಹಾಗೂ ಅಧಿಕಾರಿಗಳು ಸುಮಿತ್ ಅವರ ಈ ದೈತ್ಯ ಎಸೆತವನ್ನು ಕಂಡು ಮಂತ್ರಮುಗ್ಧರಾದರು. ಮಹಾರಾಷ್ಟ್ರದ ಸಂದೀಪ್ ಸರ್ಗಾರ್ (62.88 ಮೀ) ಬೆಳ್ಳಿ ಪದಕ ಹಾಗೂ ರಾಜಸ್ಥಾನದ ಸಂದೀಪ್ (61.83 ಮೀ) ಕಂಚಿನ ಪದಕ ಪಡೆದರು.

ತಂತ್ರಜ್ಞಾನದಲ್ಲಿ ತಂದ ಬದಲಾವಣೆ

ದಾಖಲೆಯ ಬಳಿಕ ಮಾತನಾಡಿದ ಸುಮಿತ್ ಅಂಟಿಲ್, “ಕಳೆದ ಮೂರು ವರ್ಷಗಳಿಂದ ನಾನು ಈ ಕ್ಷಣಕ್ಕಾಗಿ ಕಾಯುತ್ತಿದ್ದೆ. ನನ್ನ ರನ್ನಿಂಗ್ ರಿದಮ್ ಮತ್ತು ದಾಳಿ ಮಾಡುವ ತಂತ್ರಗಳಲ್ಲಿ (techniques) ಹಲವು ಬದಲಾವಣೆಗಳನ್ನು ಮಾಡಿಕೊಂಡಿದ್ದೆ. ಈ ಬದಲಾವಣೆಗಳು ನನ್ನ ರನ್-ಅಪ್ ಶಕ್ತಿಯನ್ನು ಸಂಪೂರ್ಣವಾಗಿ ಎಸೆತಕ್ಕೆ ಬಳಸಿಕೊಳ್ಳಲು ನೆರವಾದವು” ಎಂದು ಹರ್ಷ ಪಡಿಸಿದ್ದಾರೆ. ಶೀಘ್ರದಲ್ಲೇ 80 ಮೀಟರ್ ಗಡಿಯನ್ನು ದಾಟುವ ಮಹತ್ವಾಕಾಂಕ್ಷೆಯ ಗುರಿಯನ್ನು ಅವರು ಹೊಂದಿದ್ದಾರೆ.

ಅಪಘಾತಕ್ಕೂ ಮಣಿಯದ ಅಪ್ರತಿಮ ವೀರ

2015ರಲ್ಲಿ ಸಂಭವಿಸಿದ ಭೀಕರ ಬೈಕ್ ಅಪಘಾತದಲ್ಲಿ ಸುಮಿತ್ ತಮ್ಮ ಎಡಗಾಲನ್ನು ಮೊಣಕಾಲಿನಿಂದ ಕೆಳಗೆ ಕಳೆದುಕೊಂಡಿದ್ದರು. ಅಪಘಾತಕ್ಕೂ ಮುನ್ನ ಕುಸ್ತಿಪಟುವಾಗಿದ್ದ ಅವರು, 2018ರಲ್ಲಿ ಜಾವೆಲಿನ್ ಥ್ರೋ ಕಡೆಗೆ ಮುಖ ಮಾಡಿದರು. ಟೋಕಿಯೋ 2020 ಮತ್ತು ಪ್ಯಾರಿಸ್ 2024 ಪ್ಯಾರಾಲಿಂಪಿಕ್ಸ್‌ನಲ್ಲಿ ಸತತವಾಗಿ ಬಂಗಾರದ ಪದಕ ಗೆದ್ದಿರುವ ಇವರು, 2023, 2024 ಮತ್ತು 2025ರ ವಿಶ್ವ ಪ್ಯಾರಾ ಅಥ್ಲೆಟಿಕ್ಸ್ ಚಾಂಪಿಯನ್‌ಶಿಪ್‌ನಲ್ಲೂ ಚಿನ್ನದ ಬೇಟೆಯಾಡಿದ್ದಾರೆ.

ಅಂಗವೈಕಲ್ಯ ಎಂಬುದು ಸಾಧನೆಗೆ ಅಡ್ಡಿಯಲ್ಲ ಎಂಬುದನ್ನು ಪ್ರತಿ ಎಸೆತದಲ್ಲೂ ಸಾಬೀತುಪಡಿಸುತ್ತಿರುವ ಸುಮಿತ್ ಅಂಟಿಲ್, ಭಾರತದ ಕೋಟ್ಯಂತರ ಯುವಕರಿಗೆ ನಿಜವಾದ ಪ್ರೇರಣೆಯಾಗಿದ್ದಾರೆ.

ಇತ್ತೀಚಿನ ಲೇಖನಕ್ಕಾಗಿ ಇಲ್ಲಿ ಕ್ಲಿಕ್ ಮಾಡಿ:

BREAKING: ಮುಂದ್ರಾ ಬಂದರಿನಲ್ಲಿ ₹1,189 ಕೋಟಿಗೂ ಅಧಿಕ ಮೌಲ್ಯದ ಸುಮಾರು 119 ಕೆಜಿ ಕೊಕೇನ್ (Cocaine) ಜಪ್ತಿ!